Պատերազմ ու Հաղթանակ - Լսիր Արցախ, Հայաստան ու Սփյուռք

 Դուք շատ էք լսել պատերազմի ու խաղաղության մասին: Բայց ես ձեզ հիմա պատմելու եմ պատերազմի ու հաղթանակի մասին: Լսի՛ր Արցախ, Հայաստան ու սփյուռք. Հաղթանակ միշտ կա, բայց դու պիտի իմանաս, որտեղ է այդ հաղթանակը, որ դու էլ այնտեղ լինես: Հաղթանակը միայն Քրիստոսինն է, ու բոլոր նրանցը, ովքեր Քրիստոսի մեջ են: Մարդիկ միշտ դժվար իրավիճակներից փրկիչ ու առաջնորդ են սպասում, որ գա իրենց ազատի ու իրենք էլի շարունակեն գնան իրենց չար գործերն անեն, աբորտ, սուտ, կեղծիք, խաբել, ագահություն, եսասիրություն, նախանձ ու նման չար բաներ: Դուք դրա համար է՞ք խաղաղություն ուզում: Որ էլի շարունակեք նույն անաստված ձևով ապրել, աբորտներ անել, իրար խաբել, իրար ատել ու իրար միս ուտե՞լ: Այդպես չի լինի: Բա ի՞նչ կլինի: Կլինի միայն հաղթանակ, ու այդ հաղթանակը Քրիստոսինն է: Լա՛վ լսեք, ով Քրիստոսի մեջ է, ով հավատարիմ է Նրան, ով հնազանդվում է Նրան, ապա նրանն էլ կլինի հաղթանակը: Հասկացեք մարդիկ, բոլոր պատերազմներում հաղթանակը միայն Քրիստոսինն է: Մի Քրիստոնյա մարդ շատ դիպուկ նկատեց, որ Աստված ցանկանում է փրել մարդկային ՀՈԳԻՆԵՐԸ: Ոչ թէ մարմինները, ոչ թէ կյանքերը, ոչ թէ պետություններն ու երկրները, այլ այն մարդկանց հոգիները ում դեռ կարելի է փրկել զղջումով ու ապաշխարությամբ: Ու Աստված դա կանի թէ պատերազմով, թէ սովով, թէ հիվանդությամբ, թէ նեղությամբ: Նա այս և նման միջոցներով փրկում է նրանց, ովքեր ի վիճակին են զղջալ իրենց մեղքերի համար ու ապաշխարել, ու հենց սրա մեջ է Քրիստոսի հաղթանակը: Սա է Քրիստոսի պլանը, որն իրագործվում է բացարձակ կերպով: Քրիստոսը չի փրկելու ձեր այս մարմինը: Նա հետո դրան հարություն կտա: Իսկ հոգին՝ ուրիշ բան: Ու եթե այդ հոգին փրկելու համար այն պետք է պատերազմով, ցավով ու նեղությամբ անցնի, հենց այդպես էլ կլինի: Ու այդ հոգին կփրկվի: Հենց սրա մեջ է Քրիստոսի հաղթանակը: Սիրելի ժողովուրդ, սա պետք է վերջապես հասկանալ: Տեսեք աշխարհում ու մեր շուրջն ինչ է կատարվում: Երկնքում, ոչ մեկին չի հետաքրքրում այս աշխարհին լավ կյանք ու խաղաղությունը տալը: Այնտեղ կարևոր է այլ բան՝ որպեսզի այն մարդիկ, ովքեր ի վիճակի են ապաշխարել, փրկվեն հավիտենական կյանքի համար:

Ես ձեզ միշտ ասում եմ, որ փափուկ բարձ մի դրեք ձեր գլուխների տակ: Մենք ոչ մեկս մշտական չենք ապրելու այստեղ: Ամեն օր մենք մոտենում ենք մահվան: Ամեն օր դու և ես մոտենում ենք մահվան: Ու եթե այսքան պատերազմներն ու տառապանքները ձեզ դեռ սա չեն համոզել, ապա եթե ողջ մնաք կհամոզվենք երբ Աստված մի օր սկսի իր վերջին հատուկ գործողությունը, որի մասին գրված է Աստվածաշնչի Հայտնության գրքում: Այն ժամանակ ամեն մեկը միանգամից կհասկանա, որ հաղթանակը Քրիստոսինն է, ու որ հաղթող Քրիստոսը ձեր իմացած փափուկ, ամեն ամեն ինչ ընդունող ու ներող Քրիստոսը չի: Այլ կիմանաք, որ Քրիստոսն ատում է կեղծիքն ու սիրում է ճշմարտություն, Աստուծո ճշմարտությունը: Նա արդար դավավոր է ու ողորմած՝ ապաշխարողների նկատմամբ:

Ու Քրիստոսն իր վրեժն է առնելու: Այ տեսեք Աստված ինչ է ասում: «Իմացե՛ք արդ, որ Ես ԵՍ ԵՄ, Ինձնից բացի է՛լ աստված չկա. Ե՛ս եմ մեռցնում և ե՛ս՝ ապրեցնում, Ե՛ս եմ հարվածում և ե՛ս՝ բժշկում, Եվ իմ ձեռքից ազատող չկա. Որովհետև ձեռքս երկինք եմ բարձրացնում Եվ ասում. "Ես հավիտյան կենդանի եմ". Երբ իմ փայլատակող սուրը սրեմ, Եվ ձեռքս դատաստանը գործադրի, Իմ թշնամիներից ես վրեժ կլուծեմ Եվ ինձ ատողներին կհատուցեմ» (Բ Օր. 32:39-41): Այս խոսքերն Աստված է ասում, ու այս խոսքերը չեն չեղարկվել: Նա վրեժ է լուծելու միլիարդավոր աբորտ արած երեխանրի արյան համար ում համար մեղավորները չեն զղջացել ու չեն ապաշխարել: Նա վրեժ է լուծելու Իր մարտիրոսների համար, Նա վրեժ է լուծելու միլիարդավոր խաբված ու հարստահարված մարդկանց համար, Նա վրեժ է առնելու մեղքի համար:  - Ուրեմն ապաշխարեք, քանի դեռ ժամանակ կա: Դարձեք Քրիստոսին ու հնազանդվեք նրան: Ուրիշ փրկության դուռ չունեք, ոչ դուք, ոչ ես: Փնտրեք Քրիստոսին, որովհետև հաղթանակը միայն Իրենն է, ու նրանցը, ովքեր Քրիստոսի մեջ են:

Ամեն Իշխանություն Աստծուց է Կարգված: Հետո՞...

 Ճիշտ է որ ամեն իշխանություն Աստծուց է կարգված: Այդ մասին հստակ ասվում է Աստվածաշնչում, այն էլ մի

քանի տեղերում: Բայց գիտե՞ք Աստծուց կարգված լինելը չի նշանակում, միշտ լավ իշխանություն, կամ ձեր

սրտով ձեր ուզածով իշխանություն, կամ Աստծուն հաճելի իշխանություն: Եկեք Աստվածաշնչյան օրինակներով

նայենք, թէ Աստված ինչ է ասում իշխանության մասին, և թէ սուրբ մարդիկ ինչպես են մեկնաբանել Աստծո

խոսքն իշխանության մասին:

1. Պողոս առաքյալը Հռոմեացիներին գրում է, որ «չկայ իշխանութիւն, որ Աստծուց չլինի. եւ եղած

իշխանութիւնները Աստծուց են կարգուած (Հռ. 13:1):

2. Դանիել մարգարեն Աստծո մասին ասում է, «Նա է եղանակներն ու ժամանակները փոխողը, թագավորներ

իջեցնողը և թագավորներ կարգողը» (Դան. 2:21):

3. Տեր Հիսուսը Պիղատոսին ասեց «Դու ինձ վրա ոչ մի իշխանություն էլ չէիր ունենա, եթե այն քեզ ի

վերուստ տրված չլիներ» (Հովհ. 19:11):

Բայց, տեսեք Աստուծո խոսքը նաև ասում է, որ Տերը կարող է անգամ խաբեբաների ու անարժան մարդկանց

բերել իշխանության:

Եսայի մարգարեության 3րդ գլխում Աստոծո խոսքն ասում է բառացիորեն հետևյալը. «Նրանց վրայ իշխան

պիտի կարգեմ մանուկներին, խաբեբաները պիտի տիրեն նրանց» (Ես. 3:4): Ի՞նչ էք կարծում, ինչու՞ է

Աստված թողնում, որ անարժան ու խաբեբա մարդիկ տիրեն իր ժողովրդին: Ասում է, «որովհետեւ իրենք իրենց

համար չար խորհուրդներ խորհեցին եւ ասացին. «Կապենք արդարին, քանի որ նա մեզ անհաճոյ է»։

Այսուհետեւ նրանք իրենց արարքների պտուղները պիտի ուտեն։ Վա՜յ անօրէնին, չարիքներ պիտի գան նրա

վրայ՝ ըստ իրենց կատարած չար գործերի» (Ես. 9:11):

Տեսեք, քիչ առաջ Աստծո խոսքից լսեցինք, որ ամեն իշխանություն Աստծուց է չէ՞: Հիմա տեսեք ինչ է ասում

այդ նույն Խոսքը. «Վա՜յ քեզ, երկի՛ր, որ թագավորդ մանուկ է, և որ իշխաններդ վաղ առավոտից հացկերույթի

են»:  Ու երբ որ Աստված այսպիսի իշխանություն է տալիս որևէ ազգի, նրանց ամբարշտության պատճառով,

այդ ազգին գցում է Իր աչքից, և նրա անփորձ ու խաբեբա առաջնորդները սխալ սխալի ետևից են թույլ տալիս,

երկրին տանելով դեպի պետականության կորուստ: Ճիշտ այդպես եղավ հրեա ազգի հետ Սեդեկիայի

թագավորության ժամանակ, որը բերեց պետականության կործանման, Երուսաղեմի տաճարի այրման և ամբողջ

ազգի բաբելական գերության: Երեմիա մարգարեն գրում է «Տէրը զայրացել էր Երուսաղէմի եւ Յուդայի երկրի

վրայ այն աստիճան, որ նրանց իր աչքից գցեց, եւ Սեդեկիան ապստամբեց բաբելացիների արքայի դէմ»

(52:3):

Սուրբ մարդիկ ասում են, որ ամեն ազգի իշխանություն է տրվում ըստ իր հոգևոր հասակի: Եթե բարեպաշտ են

ազգի զավակները, սիրում են հնազանդվել Աստծո պատվիրաններին, սիրում են Աստծուն ու մեկը մյուսին,

ապա նրանց տվրում է բարվոք իշխանություն: Իսկ, եթե ազգի զավակները ամբարիշտ են, սիրում են

անարդարություն և հեռացել են Աստծուց ու գործում են չարություն, ապա ինչպես տեսաք Եսայի մարգարի

գրվածքից, նրանց վրա իշխան են կարգվում անփորձները, խաբեբաներն ու անարժանները:

2րդ հազարամյակի սկզբում, Բյուզանդական կայսրությունում մի դաժան հեղաշրջում եղավ: Զորավարներից

մեկը գրավեց իշխանությունը, կայսրի առաջ սպանեց իր զավակներին, ապա կայսրին ու դեռ երկար ժամանակ

արյունարբում սպանում էր իր հակառակորդներին: Ու սա Քրիստոնեական կայսրության մեջ: Մի ճգնավոր,

ամբողջ գիշեր, քունը հաղթահարելով աղոթում էր ու խնդրում թէ «Տեր, բա մենք Քրիստոնյա ժողովուրդ ենք,

Քրիստոնյա կայսրություն, մի՞ թէ մեզ սրան արժան գտար, ինչու՞ ես իշխանություն տալիս այս մարդուն մեր

վրա»: Եվ առավոտվա կողմ նրան երկնքից ձայն եկավ, ու ասաց. «Ավելի վատին էի փնտրում, չգտա»:

Սբ. Բարսեղ Կեսարացին ասում է, թագավորը չի փրկվում իր բանակի զորությամբ, այլ Աստուծո շնորհով: Սբ.

Եփրեմ Ասորին ասում է, եթե անարդար կամ դաժան է իշխանությունը, ապա դա անարդարներին սանձելու և

արդարներին արդարացնելու համար է: Իսկ, եթե բարվոք է իշխանությունը, ապա դա ողորմությամբ է տրված:

5րդ դարի Եգիպտական հայրերից Իսիդոր Պելուսիոտն ասում է. «եթե ինչ-որ չարագործ ապօրինաբար զավթել

է այս իշխանությունը, ապա մենք չենք պնդում, որ նա նշանակվել է Աստծո կողմից, այլ ասում ենք, որ նրան

թույլատրվում է կամ փսխել իր ողջ չարությունը, ինչպես փարավոնը, և այդ դեպքում ենթարկվել ծայրահեղ

պատժի, կամ էլ պատժել նրանց՝ ում դաժանություն է պետք, ճիշտ այնպես, ինչպես Բաբելոնի թագավորը

խելքի և զղջումի բերեց հրեաներին:

Սիրելի ազգակիցներ: Հասկանու՞մ էք, մենք չենք կարող մեր շուրջը կամ մեր երկրում ոչինչ փոխել, եթե մենք

չենք ուզում նախ փոխել ինքներս մեզ: Եթե դու ուզում ես, որ քո շուրջը բոլորն ազնիվ լինեն, ուրեմն առաջինը

դու պիտի ազնիվ լինես: Եթե դու ուզում ես, որ քո շուրջը բոլորն արդար ու սիրալիր լինեն, ուրեմն առաջինը

դու պիտի արդար ու սիրալիր լինես մարդկանց նկատմամբ: Հետևաբար, մենք պետ համոզվենք, որ ցանկացած

իշխանություն, ի վերջո պատահական երևույթ չէ, այլ որև ազգի հոգևոր վիճակի ուղիղ հետևանք: Իսկ մենք

հիմա գտնվում ենք մի սարսափելի ու ահավոր հոգևոր վիճակում: Այ նայեք աշխարհի պատմությանը:

Ռուսաստանը 20րդ դարի սկզբին կարծես թէ Քրիստոնեական կայսրություն էր: Բա ինչու՞ Աստված արտոնեց,

որ անհավատ ու աստվածամարտ բոլշեվիկները գան իշխանության:

Դուք գիտե՞ք ինչ ողբով է Սբ. Իոհան Կռոնշտադսկին 20րդ դարի առաջին տարիներին գրում ժղովրդի

անհավատության և Աստծուց հեռանալու մասին: 1905 թվականի հեղափոխության ժամանակ նա գրում է, որ.

«Սա մեր հոգևոր վիճակի հետևանքն է»: Հետևաբար իշխանություն չկա որ Աստծուց կարգված չլինի: Ամեն

ինչ օրինաչափ է ու մեր հոգևոր վիճակի հետևանքը:

Բա լավ հիմա ի՞նչ անենք: Ինչպես պետք է լինի մեր վերաբերմունքը: Սուրբ մարդիկ ասում են, որ ամեն մեկս

պետք է նայենք մեր ներսը: Ինչպիսի՞ն եմ ես: Ինչպիսի՞ն է իմ հոգևոր վիճակը: Ինչպիսի՞ն է իմ

հարաբերությունը Տեր Հիսուս Քրիստոսի հետ, որ թագավորների Թագավորն է ու տերերի Տերը: Եթե ամեն

մեկս վերադառնանք Քրիստոսին, մաքրենք մեզ կեղտից ու հրաժարվենք բոլոր չարություններից, դա էլ կփոխի

իրավիճակը: Քանզի Աստված ամեն ազգի իշխանություն է թույլ տալիս ըստ իր հոգևոր հասակի կամ ըստ իր

հոգևոր վիճակի:

Պատմության մեջ գրեթե չի եղել որ մարդիկ միշտ գոհ մնացած լինեն իշխանություններից: Ես 50 տարեկան եմ

ու հիշում եմ, որ ժողվուրդը գրեթե ճնշող մեծամասնությամբ դժգոհ է մնացել բոլոր նախորդ և հիմա էլ ներկա

իշխանությունից: Սրա համար կան շատ օբյեկտիվ պատճառներ: Դրա համար էլ Աստված և նախորդներից է

իշխանությունը վերցրել, և ներկաներից կվերցնի և գալիքներին է տալու և վերցնելու: Բայց եթե դու ուզում ես

դրական փոփոխություն, հարցրու ինքդ քեզ: Այս իշխանությունը որտեղի՞ց եկավ: Լուսնից ընկա՞վ: Դու ուզում

ե՞ս կոռուպցիան ու անարդարդությունը վերանա: Չէ՞ որ հին ու նոր, նախորդ ու ներկա բոլորը մեր ազգի

ծոցից են դուրս ելել: Դուք ազգային խորհրդարանին էք չէ՞ ձայն տվել: Քանի՞ մարդ գիտեք մեր

խորհրդարանից, որ ամեն կիրակի Պատարագի է մասնակցում ու հաղորդվում Տիրոջ կենարար մարմնին ու

արյանը: Մենք մեր գործերի արժանի հատուցումն ենք ստանում: Հենց որ իսկապես զղջանք մեր չար գործերի

համար ու վերադառնանք Քրիստոս Աստծուն, ապա ամեն ինչ կփոխվի դեպի լավն ու բարին: Դրա համար

դարձն ու ապաշխարությունը միակ ելքն է: Մնացածն անպտուղ եղան ու անպտուղ էլ լինելու են:

Իսկ իշխանություններն էլ պետք է լավ իմանան, որ եթե իրենք հավատում են, որ կարգված են Աստծուց, ապա

Աստծո կամքը պիտի կատարեն, Աստծո պատվիրաններով ապրեն, Աստծո գործն անեն, աստվածատուր

հայրենիքը պաշտպանեն այլ ոչ թէ Աստծուն ու Քրիստոսի եկեղեցուն հակառակվեն: Հիշու՞մ էք եգիպտական

փարավոնին ինչ եղավ, որ իր ամբողջ զորքով խորտակվեց Կարմիր Ծովում: Հիշու՞մ էք Ալեքսանդր

Մակեդոնացին ինչպես ավարտեց իր կյանքը: Հիշու՞մ էք ինչ եղավ Նապոլեոնին, կամ ուրիշ իշխանավորներին:

Բոլոր չար իշխանությունները կամ դաժան վախճան ունեցան, կամ էլ երկար տառապանքից հետո

ապաշխարությամբ սկսեցին մաքրվել, ինչպես օրինակ Նաբուգոդոնոսոր Բաբելական արքան, մեր Հայոց Սբ.

Տրդատ արքան, կամ Նապոլեոնը՝ ով Քրիստոսին եկավ Սբ. Հեղինե կղզում աքսորի ժամանակ:

Տեր Հիսուսն ասաց, որ. «Ում շատ է տրված նրանից շատ պիտի պահանջվի»: Իշխանությունները պետք է մեծ

երկյուղով ու դողով կատարեն Աստծու կամքը: Իշխանությունները չպիտի կատարեն որևէ այլ կամք, քան թէ

Աստծո կամքը: Եվ վայ այն երկրի իշխանավորներին, ովքեր չեն հնազանդվում Աստծուն: Քանի որ ամեն մեկը

արժանի հատուցում է ստանալու իր գործերի համար: Եվ քանի որ «ամեն իշխանություն Աստծուց է» խոսքը

գրել է Պողոս առաքյալը, ապա այս խոսքն ավարտեմ Պողոս առաքյալի ևս մի այլ խոսքով, որ ասում է թէ

«Այսպես ուրեմն՝ ով կարծում է, թե կանգնած է հաստատ, թող զգույշ լինի, գուցե թե ընկնի»:(Ա Կորնթ.

10։12)։

Իսկ, մենք ժողովուրդ ջան, մեր ուշքը դարձնենք ապաշխարությանը: Հոգևոր օրինաչափություն կա:

Իշխանությունը կփոխվի այն աստիճանով, ինչ աստիճանով որ կփոխվեն այդ երկրի մարդիկ և ինչպիսին

կդառնա նրանց հավաքական սիրտը: Թէ չէ, հեղափոխություն, հեղաշրջում, արյուն, ծառաները տերեր են

դառնում, տերերը՝ ծառաներ, ու ոչ մի բան չի փոխվում: Նայեք անցյալի բոլոր հեղափոխություններին: Միայն

Ֆրանսիական հեղափոխության ժամանակ ինչքան երեխաների սպանեցին, գիլիոտինն աշխատում էր ավտոմատ

ռեժիմով: Ու ի՞նչ: Ավելի լավացա՞վ կյանը: Ոչ: Տեսեք հենց այսօր ինչ է կատարվում Ֆրանսիայում և

հատկապես Փարիզի փողոցներում: Ուրեմն Առանց մարդու ապաշխարության չի կարող նրա կյանքը դեպի լավը

փոխվել, առանց մարդու անհատական փոփոխության չի կարող լինել իշխանության փոփոխություն: Դեռ

ինչքա՞ն պիտի տառապենք, որ սա հասկանանք:

Երեմիայի մարգարեությունում, երբ Տերը դատում էր իր ժողովրդին՝ ասաց. «Քո ապստամբությունը քեզ խրատ

է լինելու, և քո չարությունները կշտամբելու են քեզ: Խելքի կգաս ու կտեսնես, որ քեզ համար դառնաղետ է ինձ

լքելը, ասում է Տեր Աստվածը» (2:19): Ուստի, եկեք Տիրոջը խնդրենք, որ մեզ նորոգի ու մեր ազգի միջից

հանի բարեպաշտ թագավորներ ու աստվածասեր իշխաններ, ինչն ամեն Պատարագի մենք հիշատակում ենք:

Միասնական աղոթք մեր անձերի փրկության, հայրենիքի ու եկեղեցու զորացման համար

 

Միասնական աղոթք մեր անձերի փրկության, հայրենիքի ու

եկեղեցու զորացման համար

 

Տերունական Աղոթք

Հայ՛ր մեր, որ յերկինս ես, սուրբ եղիցի անուն Քո, 

եկեսցէ արքայութիւն Քո, եղիցին կամք Քո որպէս յերկինս եւ յերկրի:

Զհաց մեր հանապազորդ տո՛ւր մեզ այսօր. 

եւ թո՛ղ մեզ զպարտիս մեր, որպէս եւ մեք թողումք մերոց պարտապանաց:

Եւ մի՛ տանիր զմեզ ի փորձութիւն, այլ փրկեա՛ զմեզ ի չարէ, 

զի Քո է արքայութիւն եւ զօրութիւն 

եւ փառք յաւիտեանս. 

ԱՄԷՆ:

 

Հաւատով խոստովանիմ (Ա)
Հավատով խոստովանում և երկրպագում եմ Քեզ`

Հա՛յր և Որդի՛ և Սո՛ւրբ Հոգի, անստեղծ և անմա՛հ բնություն,

հրեշտակների, մարդկանց և բոլոր եղածների՛ Արարիչ,
և ողորմի՛ր Քո արարածներին և ինձ՝ բազմամեղիս:

 

Հաւատով խոստովանիմ (Բ)

Հավատով  խոստովանում և երկրպագում եմ Քեզ, անբաժանելի լո՛ւյս, Միասնական Սո՛ւրբ Երրորդություն և Մի Աստվածություն, արարի՛չ լոյսի և հալածի՛չ խավարի,
Հալածի՛ր իմ հոգուց մեղքերի և անգիտութեան խավարը և Լուսաւորի՛ր միտքս`
Աղոթելու Քեզ այժմ հաճույքով ու ստանալու Քեզանից իմ Խնդրածները.

և ողորմի՛ր Քո արարածներին և ինձ՝ բազմամեղիս։

 

Տէ՛ր, ողորմեա՛

Տէ՛ր, ողորմեա՛, Տէ՛ր, ողորմեա՛,

Տէ՛ր, ողորմեա՛, Տէ՛ր, ողորմեա՛:

Աստուածածի՛ն, զքեզ ունիմ յոյս,

Բարեխօսեա մոլորելոյս,

Եւ ողորմեա՛, Տէ՛ր իմ Հիսուս,

Հոգւով, մարմնով կորուսելոյս։

Ամենասո՛ւրբ Երրորդութիւն,

Տո՛ւր աշխարհիս խաղաղութիւն

Եւ հիւանդաց բժշկութիւն,

Ազգիս Հայոց՝ այցելութիւն:

Արի՛, Աստուա՛ծ հարցն մերոց,

Որ ապաւէնդ ես նեղելոց:

Հա՛ս յօգնութիւն ծառայից Քոց,

Լե՛ր օգնական ազգիս Հայոց:

Տէ՛ր, ողորմեա՛, Տէ՛ր, ողորմեա՛,

Յիսո՛ւս Փրկիչ, մեզ ողորմեա՛:

Միջնորդութեամբ Քո Սուրբ Խաչի, Բարեխոսությամբ Ս.Աստվածածնի, Ս.Հովհաննես Մկրտչի, Ս.Գրիգոր Լուսավորչի, Ս.Սարգիս և Ս.Գևորգ զորավարների, մեր Սուրբ Վարդանանց քաջ նահատակների և բոլոր հայտնի ու անհայտ սրբերի,

Ընկա՛լ, Տէ՛ր, եւ ողորմեա՛:

Տէ՛ր, ողորմեա՛, Տէ՛ր, ողորմեա՛,

Տէ՛ր, ողորմեա՛, Տէ՛ր, ողորմեա՛:

 

ՄԱՅՐ ՍՈՒՐԲ ԲԱՐԵԽՈՍԵԱ՛

 

Սքանչելի Լույսի Սուրբ Մա´յր, դու, որ հավիտենական Աստծուն որովայնումդ կրեցիր և ծնեցիր աշխարհի ցնծությունը` Աստծո Խոսքը, աղաչում ենք,

Մա´յր Սուրբ, բարեխոսի´ր:

Աղաչի´ր մեզ համար քեզանից մարմնացած Աստծուն, Նրան, Ով խոնարհվեց Հայրական ծոցից և մարմին առավ ըստ մարդկային բնության, որպեսզի խաղաղություն պարգևի երկնքին և երկրին, աղաչում ենք,

Մա´յր Սուրբ, բարեխոսի´ր:

Աղաչի´ր մեզ համար քեզանից մարմնացած Աստծուն, որ ների մեզ, անտեսի մեր հանցանքները և օգնական լինի` դիմադրելու հակառակորդին պատերազմի ժամանակ, աղաչում ենք,

Մա´յր Սուրբ, բարեխոսի´ր:

Աղաչի´ր մեզ համար քեզանից մարմնացած Աստծուն, որ լռեն պատերազմները, դադարեն թշնամիների հարձակումները, երկրի վրա սեր և արդարություն հաստատվի, աղաչում ենք,

Մա´յր Սուրբ, բարեխոսի´ր:

Աղաչի´ր մեզ համար քեզանից մարմնացած Աստծուն, որ շատացնի մեր երկրում աղբյուրների բխումը, բույսերի ու տնկիների առատ պտղաբերությունը` ծառայելու մեզ հարկավոր ամեն պետքի, աղաչում ենք,

Մա´յր Սուրբ, բարեխոսի´ր:

Աղաչի´ր մեզ համար քեզանից մարմնացած Աստծուն, որ միաբանվի առաքյալների և մարգարեների հիմքի վրա կառուցված Իր Սուրբ Եկեղեցին, անարատ պահի այն մինչև իր երևելի գալստյան օրը, աղաչում ենք,

Մա´յր Սուրբ, բարեխոսի´ր:

Աղաչի´ր մեզ համար, Սրբուհի´, քո Միածին Որդուն, նաև մեր հանգուցյալների հոգիների համար, որպեսզի ընդունի նրանց երկնքի արքայության մեջ և մաս ու բաժին հատկացնի բոլոր սրբերի հետ, աղաչում ենք,

Մա´յր Սուրբ, բարեխոսի´ր:

 

ԱՂՈԹՔ ԲԱՐԵԽՈՍԱԿԱՆ

 

Սրբերի պսակադրող ՔՐԻՍՏՈՍ, Դու, որ լուսեպսակ ես շնորհում Քո Սրբերին, կատարում Քո երկյուղածների խնդրանքները, սիրով ու քաղցրությամբ նայում  Քո արարածներին, լսի՛ր մեզ երկնից՝ Քո սրբությունից, Ս.Աստվածածնի Բարեխոսությամբ, աղոթքներով Ս.Հովհաննես Մկրտչի, Ս.Գրիգոր Լուսավորչի, Սեբաստիայի 40 Սուրբ Մանուկների, Ս.Սարգիս և Ս.Գևորգ Զորավարների, մեր Սուրբ Վարդանանց քաջ նահատակների, բոլոր ժամանակների հայտնի ու անհայտ Սրբերի ու Նահատակների.

Լսի՛ր մեզ, Տե՛ր, և ողորմի՛ր, ներիր՛, քավի՛ր և թողություն տու՛ր մեր մեղքերին:

Արժանացրու՛ գոհությամբ փառավորել ՔԵԶ, ՀՈՐ և ՍՈՒՐԲ ՀՈԳՈՒ հետ միասին,

Այժմ և միշտ և հավիտյանս հավիտենից, Ամեն:

 

ՆԱՐԵԿ ԲԱՆ ԽԱ (41)

ՍՐՏԻ ԽՈՐՔԵՐԻՑ ԽՈՍՔ ԱՍՏԾՈ ՀԵՏ

 

Ա 

Որդի՛ կենդանի Աստուծո, ամենաօրհնյա՛լ, 

Անքնին ծնունդ դու ահավոր Հոր, 

Քեզ համար չկա ոչինչ անհնար ու անկարելի: 

Երբ ողորմությանդ փառքի անստվեր ճաճանչները ծագեն, 

Կհալվեն մեղքերը, կհալածվեն դևերն ու կջնջվեն հանցանքները, 

Կխզվեն կապանքները, կխորտակվեն շղթաները, 

Կկենդանանան մեռյալները, կբուժվեն զարկվածները, 

Եվ վերքերը կառողջանան.

Կվերանան ապականությունները, տեղի կտան տխրությունները, 

Կնահանջեն հեծությունները, կփախչի խավարն, ու մեգը կմեկնի, 

Կցրվի մառախուղն, ու մռայլը կփարատվի. 

Կսպառվի աղջամուղջը, կվերանա մութն, ու գիշերը կանցնի, 

Տագնապը կտարագրվի, կչքանան չարիքները, 

Հուսահատությունները կհալածվեն, 

Եվ կթագավորի քո ձեռքն ամենակարող, 

քավի՛չդ բոլորի: 

 

Բ 

Դու չեկար կորցնելու մարդկանց հոգիներն, այլ ազատելու. 

Ների՛ր ինձ անթիվ չարիքներս` քո բազում ողորմությամբ,

Զի դու միայն ես երկնքում անճառ և երկրում` անզնին, 

Գոյության տարրերի մեջ և աշխարհի բոլոր ծագերում, 

Սկիզբն ամեն ինչի, և ամեն ինչի մեջ` ամբողջ լրումով, 

Օրհնյա՜լ ի բարձունս. 

Եվ քեզ` Հոր ու Սուրբ Հոգուդ հետ` փա՜ռք հավիտյանս.

Ամեն։

ԱՂՈԹՔ ԶՂՋՄԱՆ ՈՒ ՕԳՆՈՒԹՅԱՆ

Ամենազոր Աստված, Տեր Հիսուս Քրիստոս, ընկած Քո առջև աղաչում եմ ներիր իմ մեղքերը, լսիր իմ աղոթքն ու խնդրանքը, հասիր օգնության մեզ, ապաշխարության հոգի դիր մեր ազգի զավակների մեջ, ողորմիր ու այց կատարիր: Աստուա՛ծ իմ, սաստիկ ցավում եմ Քեզ վշտացնելու համար, որովհետեւ անսահմանորէն բարի ես ու սիրելի: Զղջում եմ գործածս մեղքերի համար և չեմ ուզում այլևս մեղանչել: Ցանկանում եմ կյանքս ապրել այս զղջումով և խնդրում եմ Քեզանից, դարձիր դեպի ինձ, դարձիր դեպի մեր ազգը և Հայ ժողովրդին շնորհիր դարձ ու ապաշխարություն: Օգնի՛ր մեզ սիրել Քեզ ու սիրել միմյանց, միաբանվել Քո Սուրբ անվան շուրջ: Թող Քո Սուրբ կամքը ճանաչենք մենք, դրանով առաջնորդվենք ու գործենք, այլ ոչ թե մեր կամքով: Օգնի՛ր մեզ խուսափել մեղքերից և զղջալ դրանց համար: Օգնիր մեզ Տե՛ր, Քո անունը Սուրբ պահել մեր սրտերում, Քո արքայությունը փնտրել մեր կյանքի բոլոր օրերում, միաբանվել Քո շուրջ, լինել միաշունչ և միախորհուրդ: Աղաչում ենք, Տե՛ր. ընդունելի արա մեր ԱՂՈԹՔԸ, շնորհ տուր, որ համախոհ լինենք, որպէսզի միասիրտ եւ միաբերան փառաւորէնք Աստծուն: «Ոմանց աչքը ռազմակառքերին է, ուրիշներինը՝ երիվարներին։ Իսկ մենք մեր Աստծու անունն ենք կանչում» (Սաղմ. 19:8): Լսի՛ր մեր խնդրանքները Տե՛ր, Քո խոսքերի համաձայն, թե. «Ինչ իմ անունով իմ Հօրից ուզէք, պիտի տայ ձեզ», «Խնդրեցէ՛ք եւ պիտի ստանաք»: ԱՄԵՆ:

 

ԱՂՈԹՔ ՄԵՐ ԵԿԵՂԵՑՈՒ և ՀԱՅՈՑ ԱԶԳԻ ՀԱՄԱՐ

Տե՛ր Հիսուս Քրիստոս, Որդի Աստուծո, ողորմի՛ր և օրհնի՛ր Հայ Առաքելական Եկեղեցին և ապաշխարության առաջնորդիր Հայոց ազգին: Զորացրու՛ ու պայծառեցրու՛ մեր Եկեղեցին, որ միշտ Քո ճշմարիտ Խոսքը քարոզի Հայոց մեջ ու աշխարհում: Ավելացրու՛ հույսը, հավատը և սերը մեր բոլորի մեջ, որ մասն ենք Քո ընդհանրական եկեղեցու: Ավելացրու՛ մեր Եկեղեցու մշակների թիվը, որ Քո Ավետարանն ու ապաշխարության կոչը հասցնե՛ն մեր ազգի զավակներին: Տե՛ր, Հայ Առաքելական Եկեղեցուն, որը հիմնեցիր Քո Սուրբ Առաքյալների ու Սուրբ Լուսավորչի միջոցով, շնորհիր անսասան ընթացքով ու ուղիղ վարդապետությամբ առաջնորդել իրեն վստահված հոտը դեպի հոգու փրկություն:

Հիշի՛ր Տեր, ողորմի՛ր և օրհնի՛ր Քո բոլոր ուղղափառ եպիսկոպոսներին, վարդապետներին, քահանաներին, որպեսզի ուղիղ վարդապետությամբ ուսուցանեն Քո Ճշմարիտ Խոսքը: Տե՛ր նաև օրհնի՛ր Քո եկեղեցու բոլոր նվիրյալ սպասավորներին:

Տե՛ր Աստված մե՛ր, հզոր և ամենողորմ: Խոնարհաբար խնդրում ենք նաև, Քո բարության ներքո պահի՛ր ու պահպանի՛ր Մայր Աթոռ Սուրբ Էջմիածինը բոլոր փորձություններից ու չար հանգամանքներից: Պաշտպանի՛ր և զորացրու՛ Հոգևոր դասը, բոլոր տիրանվեր ու սրբակրոն հոգևորականներին իրենց ողջ առաքելության և ընթացքի մեջ, որպեսզի չարը չհասնի նրանց ու ամեն գործ անեն Քո փառքի և Քո ժողովրդի հոգևոր դարձի ու բարօրության համար:

Իսկ մենք, վստահելով Քեզ՝ մեր միակ Կենդանության Հույսին ու Փրկության Ապավենին, քաջալերվելով Քո խոստումից, թե. «Եթէ ձեզնից երկուսը միաբանուեն երկրի վրայ որեւէ խնդրանքի համար, ինչ էլ որ խնդրեն, կը կատարուի նրանց համար իմ Հօր կողմից, որ երկնքում է. որովհետև ուր երկու կամ երեք հոգի հաւաքուած լինեն իմ անունով, այնտեղ եմ ես, նրանց մէջ»՝ օրհնում և փառավորում ենք Ամենասուրբ Երրորդությանդ` Հորը, Որդուն և Սուրբ Հոգուն, այժմ և միշտ և հավիտյանս հավիտենից: ԱՄԵՆ:

ԱՂՈԹՔ ՀԱՅ ԱԶԳԻ ՀԱՄԱՐ

Սիմեոն Երևանցի

 

Տե՛ր Աստված, խնդրում ենք, տուր Հայոց ազգիս Քո աստվածային խաղաղությունը, առաքի՛ր քո Սուրբ Հոգին, որպեսզի ողջ ժողովրդիս սրտի մեջ հեղի սիրո և միաբանության շնորհը։

 

Բազումողորմ Տեր, գթա՛ ցրված հոտիդ և մի՛ թող տանջվել անմիաբան հոգով։

Տե՛ր Աստված մեր, ամեն ժամ զորավիգ և օգնակա՛ն եղիր ազգիս՝ տանը և ճանապարհին, ծովում և ցամաքում, առնելիս և տալիս, վարելիս և վաստակելիս և հաջողիր բոլոր բարի գործերում։

Տե՛ր Աստված մեր, շնորհի՛ր նաև  ազգիս  առաջնորդներին բարեպաշտություն և միմյանց հանդեպ սեր, մղի՛ր նրանց աղքատ տնանկների հանդեպ գթության, խնամածության և ողջ հասարակության հանդեպ օժանդակության։

Նաև, ողորմած Աստված, հեռացրո՛ւ ցասումը և պատուհասը ողջ ազգից և գավառներից, ինչպես նաև բոլորի տներից և ողջ հայոց աշխարհից։

Փրկի՛ր չար պատահարներից և ձախորդություններից, հիվանդություններից, սովից, սրից, տարաժամ մահից, և այլ վշտաբեր պատահարներից, որոնք մեզ վրա են գալիս մեր մեղքերի պատճառով։

Ցո՛ւյց տուր բոլորին, որ Դու ես Տեր և Աստված և Քեզ հուսացողներին իսպառ չես թողնում, որի համար ամեն ինչում և ամենքից Քեզ փառք, պատիվ և երկրպագություն անբաժանելի և միասնական Սուրբ Երրորդությանդ, այժմ և հավիտյանս․

Ամեն։

 

ԱՂՈԹՔ ՉԱՐԻՑ ՊԱՇՏՊԱՆՈՒԹՅԱՆ

Մեսրոպ Վարդապետ

 

Հզո՜ր թագավոր, Քրիստոս, մեր Աստված, ապավեն` քեզ ծարավ եղողներին եւ փրկիչ` նեղության մեջ եղողներին: Դու` որ անօրենների կողմից չարչարվեցիր մեզ համար, ցո՛ւյց տուր քո զորությունը եւ եկ փրկի՛ր մեզ, որ քո արյունով գնեցիր: Թույլ մի՛ տուր, որ սատանան գերի մեզ, քո փրկածներին, մի՛ թող, որ չարը իր բնակարանը դարձնի մեզ, քո սուրբ անունով կնքված տաճարներիս. մի՛ թող, որ թշնամին կոխկռտի ու ծաղրի մեզ, քո մարմնի մեկ անդամը, այլ քո արարչական սիրով գթա՛ մեզ, քո արարածներին:

Տե՜ր, ողորմի՛ր մեզ, որ քո խաչը դարձրինք մեր միակ պարծանքը. թող քո խաչը պահի՛ մեզ տեսանելի եւ անտեսանելի թշնամուց:

Տե՜ր, ողորմի՛ր մեզ, որ քեզ` Աստծուդ ծնող ամենասուրբ կույսին ապավինեցինք. նրա աղոթքներով փրկի՛ր մեզ չարից, որպեսզի առանց փորձանքների կնքենք մեր պանդուխտ կյանքերը:

Քո տասներկու սուրբ առաքյալների եւ նրանց աշակերտած հայրապետների սիրույն ողորմիր մեզ:

Սուրբ Հռիփսիմյան եւ Գայիանյան կույսերի սիրույն, ո՜վ Աստված, ողորմի՛ր մեզ` մեղքերի մեջ կորածներիս:

Սուրբ Գրիգորի եւ նրա լուսավոր զավակների սիրույն, որոնց ձեռքով ճանաչեցինք քեզ` մեր Փրկչին, եւ որի ձեռքով Հայաստան աշխարհից հալածեցիր դեւերի բազմությունը, այժմ եւս անմիջապես հեռացրու սատանային մեզանից:

Սուրբ Վարդանանց ու Ատոմյանց զորավարների եւ նրանց ընկերացող սուրբ քահանաների սիրույն, որոնք չարի դեմ պատերազմեցին եւ նրա պատերազմը խափանելով` Հայաստան աշխարհի սուրբ եկեղեցիները կործանումից փրկեցին, հիմա՛ եւս, Տե՜ր, խափանիր սատանային` իր չար գործակիցներով միասին:

Սուրբ ճգնավորների, վանական հայրերի եւ նրանց աշակերտած այրերի ու կանանց բարեխոսությամբ ողորմի՛ր մեզ, Տե՜ր, որովհետեւ նրանք քեզանից շնորհք ստացան եւ քո անունո՛վ հաղթեցին բանսարկուի բոլոր հնարքներին: Հիմա՛ եւս, Տե՜ր իմ, քո հաղթող զորությամբ հաղթահարի՛ր հակառակամարտը եւ մեզ հաղթանակ տուր նրա ընդդիմության դեմ:

Մեր բոլոր սուրբ հայրապետների եւ առաջնորդների բարեխոսությամբ, որոնց իշխանություն տվեցիր ոտքի տակ առնելու օձերին ու կարիճներին, եւ թշնամու ամբողջ զորությունը, շնորհի՛ր, որ հիմա մենք եւս նրանց բարեխոսությամբ ոտքի տակ առնենք կամակոր վիշապի գլուխը եւ լռեցնենք ու կապենք ամեն տեսակ հերձվածողների բերանները:

Կանանց ծնունդների մեջ մեծագույնի` Սուրբ Հովհաննեսի, եւ նախավկա Սուրբ Ստեփաննոսի բարեխոսությամբ մաքրի՛ր մեզ հոգեկան ու մարմնական ամեն պղծությունից եւ արժանի արա, որ ճշմարտապես, հոգով ու ճշմարտությամբ քեզ երկրպագողների հետ միասին երկրպագենք քեզ եւ փառավորենք ամենասուրբ Երրորդությունը, այժմ եւ միշտ եւ հավիտյանս հավիտենից:

Ամեն:

ԱՂՈԹՔ ԳՐԻԳՈՐ ՍԿԵՎՌԱՑՈւ

 

Ամենագու՛թ, ամենախնա՛մ և ողորմա՛ծ Աստված աղաչում ենք հիշի՛ր Քո ժողովրդին, որ ի սկզբանե ստացար, մի՛ անտեսիր Քո եկեղեցին, որ պատվական արյամբդ գնեցիր, հիշի՛ր Քո ողորմությունը, որով երկիրը լցրիր: Նայի՛ր երկնքի Քո սրբարանից և այցելի՛ր այգիդ, որ Քո աջը տնկեց:

 

Թող չբաժանվի Քո պատվիրաններից և թող չկործանվի Քո ամենազոր խնամատարության պարիսպը: Եվ թող չտրորվի Քո թշնամիների կողմից, և թող չհավաքեն նրա պտուղները ճանապարհի անցորդները: Թող չապականեն պիղծ խոզերը, և թող չարածեն այնտեղ վայրի վարազները: Թող չասպատակեն նորից թշնամիները, և թող չապականվի Քո ժառանգությունը: Քո արյան գինն ենք, Տե՛ր, թող օտարը չժառանգի: Անհաղթահարելի աղետ կլինի, եթե չար ավազակը ծառայեցնի Քո արյամբ գնված ժողովրդին:

 

Հիշի՛ր, Տե՛ր, քանզի Խաչի միջոցով ստացար, չարչարանքներովդ փրկեցիր, արյամբդ ազատեցիր, մահվամբդ կենդանություն շնորհեցիր: Մի՛ անտեսիր Քո կրած սարսափելի տանջանքները: Մենք հանցավոր ենք, իսկ Դու՝ թողություն տվող, մեղավոր ենք, իսկ Դու՝ քավություն տվող, աղտեղացած ենք, իսկ Դու բժիշկ ես, մոլորված ենք, իսկ Դու դարձի բերող ես, կորսված ենք, իսկ Դու գտնող ես, մեռած ենք, իսկ Դու կենդանություն պարգեւող ես, տկար ենք, իսկ Դու զորավոր ես, ծանր վերքերով խոցված ենք, իսկ Դու հնարագետ ես:

 

Արդ, նույն զորությամբ, Տե՛ր, այսօր էլ ես հրաշքներ գործում՝ զորացնելով Քեզ հավատացողներին համառ թշնամու դեմ: Բոլոր մեղավորներին զգաստություն և զղջում պարգեւիր, որպեսզի խոստովանությամբ և ապաշխարությամբ մաքրվեն մեղքերից և հաղորդակից լինեն կենսատու և մեղսաքավիչ մարմնիդ և արյանդ: Եվ նրանց, ովքեր պատվիրանապահության մեջ են, զորացրու՛, որպեսզի անսասան մնան և օրըստօրե մոտենալով ելքին՝ սրտներում պահեն և գնան զորությունից զորություն և փառքից փառք ... և Քեզ փառք վերառաքենք Հորդ և ամենասուրբ Հոգուդ. այժմ և միշտ և հավիտյանս հավիտենից. ԱՄԵՆ:

Հաւատով խոստովանիմ (ԻԴ)

 

Փառավորյա՛լ Տեր,
Ընդունի՛ր Քո ծառայի Աղաչանքները և ի բարի՛ կատարիր իմ խնդրվածքները՝
Բարեխոսությամբ սրբուհի Աստվածածնի և Հովհաննես Մկրտչի և սուրբ Ստեփանոս
Նախավկայի և մեր սուրբ Գրիգոր Լուսավորչի և սուրբ Առաքյալների, Մարգարեների, Վարդապետների, Մարտիրոսների, Հայրապետների, Ճգնավորների, Կույսերի և Քո բոլոր երկնավոր և երկրավոր սուրբերի. և Քեզ՝ Անբաժանելի Սուրբ Երրորդությանդ, փա՜ռք և Երկրպագություն հավիտյանս հավիտենից. ամեն: